15/09/2026
آرے بازار لاہور کینٹ اور پراپرٹی کا کاروبار
قسط نمبر 12
کہتے ہیں قسمت کی دیوی ایک بار آپ کے دروازے پر آتی ہے، دروازہ کھٹکھٹاتی ہے اور آپ کی قسمت اور حالات بدلنے کا موقع دیتی ہے۔ یہ آپ پر منحصر ہے کہ آپ اس موقع سے فائدہ اٹھا کر کامیاب ہوتے ہیں یا ناکام۔ کامیابی کا راز محنت میں ہے۔
اسی کی دہائی میں ڈی ایچ اے لاہور کا آغاز ہوا۔ اس وقت آرے بازار ایک آباد علاقہ تھا، جبکہ اس کے اردگرد فصلیں لہلہاتی تھیں۔ یہاں کے نوجوان پڑھے لکھے اور محنتی تھے۔
راشد خان ولدغیور خان کی خالد مسجد، کیولری گراؤنڈ لاہور کینٹ کے پاس دکان تھی۔ سب سے پہلے راشد خان نے وہیں سے ڈی ایچ اے میں پراپرٹی کا کام شروع کیا۔ اس وقت ڈی ایچ اے کی مین بلیوارڈ بھی موجود نہیں تھی۔ راشد خان نے پراپرٹی کے کاروبار میں دن رات ایک کر دیے اور سخت محنت کی۔
بعدازاں عادل ہسپتال کے قریب خان اسٹیٹ کے نام سے دفتر قائم کیا۔ پھر آرے بازار لاہور کینٹ سے پرویز خان مرحوم، عارف بٹ عرف پولا، راجہ آفتاب، سیف اللہ، اسرار شاہ، شاہی فوٹوگرافر، سعید بھٹی مرحوم اور راقم مقصود حسین بھی اس کاروبار سے وابستہ ہو گئے۔
افغانستان جنگ کے زمانے میں، ضیاء الحق کے دور میں، پراپرٹی کے کاروبار میں سودوں کی ریل پیل شروع ہو گئی۔ میں نے اپنی آنکھوں سے دیکھا کہ ایک ہی دن میں ایک دفتر میں تین تین سودوں کے بیعانے ہوا کرتے تھے۔ پراپرٹی ڈیلروں کے پاس بعض اوقات کھانے کا وقت بھی نہیں ہوتا تھا۔
ڈی ایچ اے میں پہلی ڈیلرز یونین بنانے میں بھی راشد خان نے اہم کردار ادا کیا۔ باقاعدہ الیکشن ہوا اور ڈی ایچ اے کے شعلے ریسٹورنٹ میں الیکشن کی میٹنگیں ہوا کرتی تھیں۔
راشد خان دبنگ اور دلیر آدمی تھے۔ آرے بازار کے تمام ڈیلرز ان کی پشت پر تھے۔ راشد خان نے خضر حیات کو ڈی ایچ اے ڈیلرز ایسوسی ایشن کا پہلا صدر بنوایا، جبکہ ہمایوں سلطان خضر حیات کے مقابلے میں الیکشن ہار گئے۔
وقت کا پہیہ چلتا رہا اور آرے بازار کے بہت سے ڈیلرز معاشی طور پر مضبوط ہوتے گئے۔ سب کے پاس گاڑیاں آ گئیں، کاروبار میں چمک دمک آ گئی اور فورٹریس اسٹیڈیم کے ہوٹلوں میں کھانے شروع ہو گئے۔
رفتہ رفتہ آرے بازار کے بے شمار نوجوان پراپرٹی کے کاروبار میں آ گئے۔ ان میں آصف ککی شیخ، شاہد خان، راشد خان کے بھائی چندا، شفیق، آصف، طاہر، مبشر، اعجاز عرف ججا، اقبال اور بہت سے دوسرے نوجوان شامل تھے۔
شیخ آصف نثار، جو اس وقت ڈی ایچ اے ریئل اسٹیٹ کے جوائنٹ سیکریٹری ہیں، آرے بازار ہی میں پیدا ہوئے۔ وہ بے شمار صلاحیتوں کے مالک ہیں۔ ان کا آرے بازار میں پرویز خان مرحوم کے ساتھ والا گھر ہوا کرتا تھا۔
حسن اختر عباسی، یونائیٹڈ اسٹیٹ والے، کا بھی ڈی ایچ اے سے پہلے آرے بازار میں ڈاک خانے کے سامنے جنرل اسٹور ہوا کرتا تھا۔ آج حسن اختر عباسی کا ڈی ایچ اے لاہور میں بڑا نام ہے۔
شیخ آصف عرف ککی، شیخ ہوٹل والے، نے پیراگون میں پراپرٹی کے کاروبار کا آغاز کیا اور آج کل ڈی ایچ اے میں ان کا دفتر ہے۔ وہ پراپرٹی کے میدان میں اچھا نام پیدا کر رہے ہیں۔
سیف اللہ نے عادل ہسپتال کے سامنے سیفی اسٹیٹ کے نام سے دفتر بنایا۔ وہ انتہائی شریف النفس انسان ہیں اور آج کل علیل ہیں۔
پرویز خان مرحوم کے چھوٹے بھائی جاوید نے بھی ڈی ایچ اے میں پراپرٹی کا دفتر قائم کیا ہوا ہے۔
پراپرٹی کا کاروبار ایک سمندر ہے۔ دنیا کے کئی بڑے امیر افراد بھی رئیل اسٹیٹ کے کاروبار سے وابستہ رہے ہیں۔ میری اپنی فیملی کے تقریباً بیس نوجوان بھی آج پراپرٹی کے کاروبار سے منسلک ہو چکے ہیں۔
ڈی ایچ اے لاہور کے قیام اور ترقی نے آرے بازار کے نوجوانوں کو ایک بڑا موقع فراہم کیا۔ آرے بازار کے نوجوانوں نے اس موقع کو حاصل کیا اور آج کاروباری دنیا میں آرے بازار کا نام خوب روشن کر رہے ہیں۔
یقین کریں، آرے بازار کا ایک ایسا نوجوان پراپرٹی ڈیلر بھی تھا جس کے پاس کبھی سگریٹ خریدنے کے پیسے نہیں ہوتے تھے اور وہ مجھ سے پیسے لے کر سگریٹ پیا کرتا تھا۔ آج وہ ارب پتی ہے اور اس کے پاس دولت کی ریل پیل ہے۔
یہی زندگی ہے، یہی وقت کا کھیل ہے۔ موقع ملے تو محنت، دیانت اور مستقل مزاجی سے کام کرنے والا انسان کہاں سے کہاں پہنچ سکتا ہے۔
آرے بازار لاہور کینٹ ایک تاریخی علاقہ ہے، جو برطانوی دورِ حکومت میں آباد ہوا۔ یہاں تاریخی عمارتیں بھی موجود ہیں اور یہاں کے لوگوں میں آج بھی پیار، محبت اور بھائی چارہ پایا جاتا ہے۔ لوگ ایک دوسرے کے کام آتے ہیں اور ایک دوسرے کے دکھ سکھ میں شریک ہوتے ہیں۔
آرے بازار کا ایک اہم ٹرننگ پوائنٹ یہ بھی ہے کہ ڈی ایچ اے کے قریب ہونے کی وجہ سے یہاں کے لوگوں کو پراپرٹی کی دنیا میں آگے بڑھنے کے بے شمار مواقع ملے۔
راشد خان نے آرے بازار کے نوجوانوں کا رجحان پراپرٹی کی طرف بڑھایا اور آج آرے بازار کے بہت سے نوجوان اس کاروبار میں اپنا مقام بنا چکے ہیں۔
راشد خان کا لگایا ہوا پودا آج ایک تناور درخت بن چکا ہے۔
«دیارِ عشق میں اپنا مقام پیدا کر
نیا زمانہ، نئے صبح و شام پیدا کر»
مقصود حسین
آرے بازار، نشاط کالونی، لاہور کینٹ
