29/08/2026
ଯେଉଁ ବର୍ଜ୍ୟବସ୍ତୁକୁ ଦିନେ ସମସ୍ତେ ଘୃଣା କରୁଥିଲେ, ତାହା ଆଜି ଗାଁର ବିକାଶ ଓ ସବୁଜିମାର ସମ୍ପଦ ରୂପେ ପରିଗଣିତ ହେଉଅଛି। ରାଜ୍ୟ ଗ୍ରାମ୍ୟ ଉନ୍ନୟନ ଓ ପଞ୍ଚାୟତିରାଜ ପ୍ରତିଷ୍ଠାନ ପରିସରରେ ‘କଠିନ ଓ ତରଳ ବର୍ଜ୍ୟବସ୍ତୁ ପରିଚାଳନାରେ ଗ୍ରାମପଞ୍ଚାୟତର ଭୂମିକା’କୁ ନେଇ ଆୟୋଜିତ ଦୁଇ ଦିନିଆ ପ୍ରଶିକ୍ଷଣ ଶିବିରରେ ଦେଖିବାକୁ ମିଳିଛି ଏକ ବଳିଷ୍ଠ ସଂକଳ୍ପ ।
ଜଗତସିଂହପୁର, ପୁରୀ, ବଲାଙ୍ଗୀର ଜିଲ୍ଲାର ୫୮ ଜଣ ସରପଞ୍ଚ, ସମିତି ସଭ୍ୟ, ପଞ୍ଚାୟତ ନିର୍ବାହୀ ଅଧିକାରୀ, ସ୍ୱଚ୍ଛତା କର୍ମୀ ଓ ବ୍ଲକ୍ ରିସୋର୍ସ କୋଅର୍ଡିନେଟର କେବଳ ଭାଷଣ ଶୁଣିନାହାନ୍ତି, ବରଂ ନିଜ ପ୍ରଶିକ୍ଷଣରେ ଜ୍ଞାନ ଅର୍ଜନ କରିବା ସହ ନିଜ ଅଞ୍ଚଳର କାହାଣି ଅନ୍ୟ ମାନଙ୍କ ଆଗରେ ବଖାଣିଛନ୍ତି। ଏହି ବାସ୍ତବ ଅଭିଜ୍ଞତା ପ୍ରଶିକ୍ଷାର୍ଥୀମାନଙ୍କ ମନରେ ନିଜ ଗ୍ରାମପଞ୍ଚାୟତକୁ ସ୍ୱଚ୍ଛ, ସୁନ୍ଦର ଓ ଦୀର୍ଘସ୍ଥାୟୀ ସବୁଜ ଗାଁରେ ରୂପାନ୍ତରିତ କରିବାର ଆତ୍ମବିଶ୍ୱାସ ଭରିଦେବା ସହ ନିଜ ଗାଁରେ କଠିନ ଓ ତରଳ ବର୍ଜ୍ୟବସ୍ତୁର ସଠିକ ପରିଚାଳନା ପାଇଁ ସେମାନଙ୍କୁ ପ୍ରେରିତ କରିଅଛି।
ଶୌଚାଳୟ କେବଳ ଏକ ଛୋଟ ଘର ନୁହେଁ - ଏହା ଆମ ସ୍ୱାସ୍ଥ୍ୟ, ନାରୀର ସମ୍ମାନ, ପରିବେଶ ସୁରକ୍ଷା ଏବଂ ସମୃଦ୍ଧ ଓଡ଼ିଶା ଗଠନର ପ୍ରତୀକ। ଏହା ସହ କଠିନ ଓ ତରଳ ବର୍ଜ୍ୟବସ୍ତୁତ ପରିଚାଳନା କରି ନିଜ ଗାଁକୁ ସବୁଜ, ସୁନ୍ଦର, ସୁସ୍ଥ ଓ ରୋଗମୁକ୍ତ କରିବା ପାଇଁ ସେମାନେ ଏଠାରେ ଦୃଢ ସଂକଳ୍ପ ନେଇଛନ୍ତି।
ଆସନ୍ତୁ, ପ୍ରଶିକ୍ଷଣର ଏହି ଶିକ୍ଷାକୁ ନିଜ ଗାଁର ମାଟିରେ ପ୍ରତିଫଳିତ କରିବା। ପ୍ରତ୍ୟେକ ଗ୍ରାମପଞ୍ଚାୟତକୁ ସ୍ୱଚ୍ଛ ଓ ସୁନ୍ଦର କରି 'ବିକଶିତ ଓଡ଼ିଶା'ର ସ୍ୱପ୍ନକୁ ସାକାର କରିବା।
