05/11/2026
جيت نوضح وحد النقطة للناس لي عندها عقار و تحطو بسعر غير عادي يعني سعر من المستحيل يتقبلو العقل مثلا دار متفوتش 2 ملاير يقولك بيعهالي ب 4 ملاير كي تنصحو و تقولو ماهوش هاذاك هو السعر و مستحيل تتباعلك بهاذاك السعر يقولك او جاري باع هكذا
الناس ماراهيش طيش في دراهمها يا عباد الله لدرجة سعر منزل او تراب ولا شقة تضربوها X2 و يقولك علاه متباعش العقار تاعي لانو الاسعار لي راكم تحطوها خيالية فوق اللازم واحد قالي ( انا لازم نبيع ب4 ملاير باش نقدر نشري شقة في العاصمة ) هاذي مشكلة تاعك اخي ماشي تزيد في دارك لي سعر تاعها مثلا 2 ملاير تحطها للبيع ب 4 ملاير باش تسكن وين تحب
و كاين اغلبية الورثة تلقا عندهم عقار ميفوتش 2 ملاير و يقولك نبيعوه ب 8 ملاير لانهم في غاشي باش كل واحد فيهم يدي زوج ملاير!!!! هاذا رزق و حق عطاهلكم ربي بصح باش تحطو اسعار خيالية ميتقبلهاش العقل باش برك تدو قسمة كبيرة كيما قالي واحد ( حنا كي نقسمو الدار انا تصحلي غير 500 مليون و 500 متجيبلي والو قالي حطها بسومة كبيرة باش يصحلي كثر باش نقدر نشري ) بصح هاذي ماشي مشكلتنا حنا هاذا مشكل نتا تشوفلو حل ماشي تزيد في العقار تاعك كيما تحب باش تشري واش تحب و وين تحب
من هاذ المنبر ناس لي تقول الوكالات العقارية هما لي يزيدو في السعر راكم غالطين حنا عدنا نسبة ندوها فقط اما السعر كيما يمدولنا مول العقار كيما نحطوه و بالعكس كي يكون كاين زبون و شاري صح ولله حنا لي نحاولو مع مول العقار يزيد ينقص
و ايضا الناس لي نشوفو العقار تاعها بسعر خيالي اكثر من قيمتو رانا منحطوش العقار تاعهم في صفحتنا من الاخير
و اخر نقطة الدولة راهي حاطتلنا barème فيه كل الاسعار في كامل ربوع الوطن و تقدرو تطالعو عليه فقط مراهش مطبق على ارض الواقع و ماناش نخدمو بيه عدنا اسعار المتر المربع الواحد في كل شبر في الولاية و كل الاصناف تاع العقار كي المخدومة و معدولة كي لي رايبة تحبو نولو نخدمو بيه مكان حتا مشكل هكذا كل واحد يدي حقو و يبيع العقار تاعو في المعقول
مانيش نعمم على الناس كامل كيما كاين زبائن يزيدو في السعر كاين وكالات عقارية و سماسرة و وسطاء طماعين ميخدموش بضمير و يزيدو في السومة من راسهم
خلولي رايكم في التعليقات باحترام 🤍
شكراا