Muhammad Arif khan

05/08/2026

پاسبان نیوز کے اعلیٰ سطحی وفد کی سری لنکن ہائی کمشنر سے اہم سفارتی ملاقات
اسلام آباد (پریس ریلیز/سوشل میڈیا ڈیسک)
پاسبان نیوز کے مینیجنگ ڈائریکٹر و سابق رکن پنجاب اسمبلی چوہدری عامر عثمان عادل کی قیادت میں ایک اعلیٰ سطحی وفد نے پاکستان میں تعینات سری لنکا کے ہائی کمشنر ریئر ایڈمرل فریڈ سینیوراتھنے سے اہم سفارتی ملاقات کی۔ اس پروقار ملاقات میں پاسبان نیوز کے چیف ایڈیٹر عزیز الرحمن مجاہد اور کنٹری ڈائریکٹر محمد عارف خان بھی وفد میں شامل تھے۔
ملاقات کے دوران پاسبان نیوز کے وفد نے پاکستانی شہریوں کے لیے "ویزہ فری انٹری پالیسی" کے تاریخی نفاذ پر سری لنکن ہائی کمشنر کو دلی مبارکباد پیش کی اور حکومتِ سری لنکا کے اس دوستانہ اقدام پر ان کا شکریہ ادا کیا۔
اس ملاقات میں پاکستان اور سری لنکا کے درمیان سیاحت، تجارت اور سرمایہ کاری کے شعبوں میں باہمی تعاون کو فروغ دینے پر تفصیلی گفتگو ہوئی
۔ صحت، تعلیم اور دونوں ممالک کے مابین دوطرفہ ثقافتی تبادلوں کو مزید مضبوط بنانے کے عزم کا اظہار کیا گیا اور پاسبان نیوز کی جانب سے سری لنکا میں موجود سیاحتی، تجارتی اور طبی سہولیات کے مواقع کو پاکستانی عوام اور کاروباری برادری تک مؤثر انداز میں پہنچانے کی یقین دہانی کروائی گئی۔ ملاقات کے اختتام پر وفد نے سری لنکن ہائی کمشنر ریئر ایڈمرل فریڈ سینیوراتھنے کی گرمجوشی، شاندار میزبانی اور پاکستان کے لیے ان کے نیک جذبات پر ان کا شکریہ ادا کیا اور عزم کا اظہار کیا کہ پاسبان نیوز ہمیشہ مثبت، تعمیری اور قومی مفاد پر مبنی صحافت کا علمبردار رہا ہے اور آئندہ بھی اپنے قلم کے ذریعے دونوں دوست ممالک کے درمیان خیر، امن، خوشحالی اور ترقی کے پیغام کو عام کرتا رہے گا۔

01/08/2026

فرسودہ نظام انجوائے بھی، سیاسی شہادت کی تمنا بھی
(محمد عارف خان۔ کھاریاں)
پاکستان کی سیاست میں ایک عجیب و غریب تضاد ہمیشہ سے موجود رہا ہے۔ ایک طرف ہر سیاست دان، ہر تجزیہ کار، ہر عام شہری یہ کہنے کو تیار ہے کہ نظام فرسودہ ہے، ادارے کمزور ہیں اور حکمرانی کا ڈھانچہ عوام کی توقعات پر پورا نہیں اترتا۔ دوسری طرف اسی فرسودہ نظام کے اندر رہتے ہوئے اسے انجوائے کرتے سیاسی رہنماؤں اور ان کے حامیوں میں "سیاسی شہادت" کی ایک عجیب سی تمنا پائی جاتی ہے۔ یہ تمنا کبھی عدالتی کارروائیوں کے سائے میں ظاہر ہوتی ہے کبھی جیل کی سلاخوں کے پیچھے سے آواز بن کر بلند ہوتی ہے اور کبھی سڑکوں پر احتجاج کے دوران نعروں کی صورت اختیار کر لیتی ہے۔
یہ کوئی نیا رجحان نہیں۔ ہماری سیاسی تاریخ اس بات کی گواہ ہے کہ جب بھی اقتدار کے ایوانوں میں ہلچل مچی تو کچھ رہنماؤں نے اس ہلچل کو اپنی سیاسی شناخت کا حصہ بنا لیا۔ انہیں نظام نے کبھی "ظلم کا شکار" قرار دیا تو کبھی "جمہوریت کا محافظ" اور کبھی سیدھے سادے لفظوں میں "سیاسی شہید"۔ عوام نے ان کی ہمدردی میں آوازیں بلند کیں، جلسے کیے اور کئی بار انہیں اقتدار تک پہنچانے میں کردار ادا کیا۔ مگر عجیب بات یہ ہے کہ کچھ عرصے بعد وہی رہنما یا ان کے قریبی حلقے، نئے رنگ و روپ میں پھر سے حکمرانی کے ایوانوں میں نظر آئے۔ وہ جو کچھ دن پہلے "نظام کا شکار" تھے اچانک "فرسودہ نظام کے محافظ" بن گئے۔
یہ ایک ایسا چکر ہے جو بار بار دہرایا گیا ہے اور ہر بار عوام کو لگا کہ شاید اس بار کچھ بدلے گا۔ مگر بدلا کچھ نہیں۔ مہنگائی آج بھی قابو سے باہر ہے، بے روزگاری نوجوانوں کے مستقبل کو اندھیرے میں دھکیل رہی ہے، بدانتظامی ہر سرکاری دفتر کی پہچان بن چکی ہے اور بدعنوانی اس قدر گہری جڑیں جمائے ہوئے ہے کہ اسے نکالنا اب ایک عام سیاسی ارادہ نہیں بلکہ ایک چیلنج بن چکا ہے۔
آئین پاکستان ہمیں جمہوری اداروں، قانون کی بالادستی اور عوامی فلاح کی ضمانت دیتا ہے۔ یہ ایک ایسا دستاویزی سہارا ہے جسے ہم نے ہمیشہ اپنے سینے سے لگایا مگر عملی زندگی میں اس کی روح کو نظر انداز کیا۔ اداروں کی کمزوری نے نہ صرف معاشی ترقی کو روکا بلکہ عام آدمی کے اعتماد کو بھی متاثر کیا۔ احتساب کا عمل جب غیر شفاف ہوتا ہے جب قانون کے محافظ خود قانون کی پاسداری سے گریزاں نظر آتے ہیں اور جب سیاسی استحکام ایک دور دراز خواب بن کر رہ جاتا ہے تب ایک خلا پیدا ہوتا ہے اور اس خلا کو پُر کرنے کے لیے "سیاسی شہادت" کا بیانیہ سامنے آ جاتا ہے۔
سیاسی شہادت کا تصور اگر محض جذباتی سطح پر دیکھا جائے تو یہ ایک مظلومیت کا دردناک بیانیہ نظر آتا ہے مگر جب اسے تجزیاتی نگاہ سے دیکھا جائے تو یہ اکثر نظام کی ناکامیوں کو ایک فرد کی قربانی سے جوڑنے کی ایک مہارت ورانہ کوشش نظر آتی ہے۔ یہ کوشش حقیقت کو ثابت نہیں کرتی بلکہ یہ بتاتی ہے کہ جب نظام خود اصلاح کی راہ نہیں اختیار کرتا، جب ادارے اپنی ذمہ داریوں سے عاری ہو جاتے ہیں تب سیاسی بیانیے میں قربانی کا عنصر غالب آ جاتا ہے۔ ایک رہنما کی ذاتی ناکامی کو قومی المیہ بنا دیا جاتا ہے اور قومی المیے کو ذاتی مشکل میں بدل کر نظام کی ناکامیوں سے توجہ ہٹا لی جاتی ہے۔
حقیقت یہ ہے کہ فرسودہ نظام کی اصلاح کے بغیر نہ مہنگائی قابو میں آ سکتی ہے، نہ بے روزگاری کم ہو سکتی ہے اور نہ بدعنوانی پر مؤثر روک لگ سکتی ہے۔ یہ مسائل صرف ایک جماعت یا ایک دورِ حکومت تک محدود نہیں رہے۔ مختلف ادوار میں، مختلف جماعتوں نے اقتدار سنبھالا مگر عوام کی شکایات میں کوئی تبدیلی نہیں آئی۔ اس سے یہ بات واضح ہوتی ہے کہ مسائل کا سرچشمہ صرف سیاسی قیادت میں نہیں بلکہ حکمرانی کے ڈھانچے میں ہے۔
کیا موجودہ حکمرانی کا ڈھانچہ ان مسائل کے حل کی صلاحیت رکھتا ہے؟ اگر آئین کی روح کو ملحوظ خاطر رکھا جائے تو جواب "ہاں" ہونا چاہیے۔ مگر عملی طور پر جواب اس کے برعکس نظر آتا ہے۔ اس لیے ضرورت اس امر کی ہے کہ سیاسی قیادت "سیاسی شہادت کے بیانیے" سے آگے بڑھے۔ عوام کو درپیش مسائل قومی ہیں اور ان کا حل بھی قومی سطح پر سوچنا ہوگا۔ ریاستی اداروں کو قانون کی بالادستی قائم رکھنے اور شفاف احتساب یقینی بنانے کی ضرورت ہے۔ سیاسی جماعتوں کو اقتدار کے لیے نہیں، بلکہ نظام کی اصلاح کے لیے مقابلہ کرنا ہوگا۔
عوام کو بھی اس سارے معاملے میں ایک ذمہ دارانہ کردار ادا کرنا ہوگا۔ جمہوری عمل تبھی مضبوط ہوتا ہے جب شہری صرف حقوق کا مطالبہ نہیں کرتے بلکہ اپنے فرائض کا بھی احساس رکھتے ہیں۔ جب وہ سیاسی نعروں پر اندھا اعتماد نہیں کرتے بلکہ نتائج کا جائزہ لیتے ہیں۔ جب وہ "سیاسی شہادت" کے جذباتی بیانیے سے متاثر ہو کر نہیں بلکہ اصلاح کے عملی ایجنڈے کو ترجیح دیتے ہیں۔
اصلاحِ نظام، مضبوط جمہوری ادارے اور عوامی فلاح ہی وہ راستہ ہے جو اس چکر کو توڑ سکتا ہے جو ہمیں بار بار ایک ہی نقطے پر لے آتا ہے۔
سیاسی شہادت کی تمنا سے زیادہ ضروری یہ ہے کہ نظام کو ایسا بنایا جائے جہاں کسی کو شہادت کی ضرورت ہی محسوس نہ ہو۔ جہاں عدالتیں آزاد ہوں، جہاں احتساب سب کے لیے یکساں ہو، جہاں ادارے اپنی آئینی حدود میں رہ کر کام کریں اور جہاں عوام کا ووٹ واقعی ان کی طاقت بنے۔
یہ مثبت اور تعمیری راستہ ہی پاکستان کے مستقبل کو محفوظ بنا سکتا ہے۔ شہادت کے نعروں سے زیادہ پائیدار نظام کی تعمیر ہے۔ اور یہ تعمیر صرف اسی صورت میں ممکن ہے جب ہم سب — چاہے حکمران ہوں یا عوام — اس بات پر متفق ہو جائیں کہ ہمیں ایک ایسا پاکستان چاہیے جہاں سیاسی شہادت کی تمنا نہیں بلکہ ترقی اور فلاح کی ضرورت محسوس ہو۔

26/06/2026

آج کشمیر الیکشن حلقہ جموں 5 (حلقہ 38) کے حوالے سے ایک اہم مشاورتی اجلاس امیر جماعت اسلامی زون 34 اظہر اقبال چوہدری کی زیر صدارت منعقد ہوا۔
اجلاس کا آغاز حاجی ساجد حسین کی تلاوت سےہوا۔ اجلاس میں انتخابی مہم کی تیاری اور آئندہ کے لائحہ عمل پر تفصیلی مشاورت کی گئی۔
اجلاس میں حلقہ جموں 5 کے امیدوار پروفیسر رانا محمد عمر صدیق کی انتخابی مہم کو مؤثر، منظم اور عوامی رابطے پر مبنی بنانے کے لیے مختلف امور کا جائزہ لیا گیا۔
اجلاس میں باہمی مشاورت سے درج ذیل تنظیمی ذمہ داریاں مقرر کی گئیں:
- چوہدری عبدالستار پیر جنڈ کو ناظم انتخاب مقرر کیا گیا۔
- حکیم رفاقت علی اور حاجی غلام سرور کو معاونین ناظم انتخاب کی ذمہ داری دی گئی۔
- مولانا ظہور احمد منصوری کو الیکشن آفس کا ناظم مقرر کیا گیا۔
اجلاس میں تمام دیہاتوں اور وارڈز کے ذمہ داران کا اعلان بھی کیا گیا جبکہ ڈور ٹو ڈور انتخابی رابطہ مہم کے اہداف، طریقہ کار پر مشاورت کی گئی فیصلہ کیا گیا کہ انتخابی مہم کو مضبوط تنظیمی نظم، مسلسل عوامی رابطے اور مؤثر منصوبہ بندی کے ساتھ آگے بڑھایا جائے گا تاکہ ہر ووٹر تک رابطہ یقینی بنایا جا سکے
اجلاس میں یہ بھی طے پایا کہ امیدوار پروفیسر رانا محمد عمر صدیق مورخہ 4 اور 5 جولائی 2026ء کو زون کا دورہ کریں گے اور کارکنان و عوام سے ملاقاتیں کریں گے۔
اجلاس میں محمد عارف خان اور چوہدری فیصل حیات ایڈووکیٹ (جنرل سیکرٹری جماعت اسلامی یوتھ ضلع گجرات) زونل نائب امراء، ناظمین سرکل و دیگر ذمہ داران نے شرکت کی
اجلاس کا اختتام ڈاکٹر حافظ محمد ادریس کی دعا سے ہوا

17/06/2026

12/06/2026

کھاریاں شہر کے عوامی ترقیاتی منصوبے
ایک مسلسل جدوجہد، عوامی آواز اور اجتماعی کاوشوں کی داستان
کھاریاں شہر میں سروس روڈ، اوور ہیڈ برج بس اسٹاپ، اوور ہیڈ برج اور سیشن کورٹ کے سامنے موٹر سائیکل ریمپ جیسے اہم عوامی منصوبے کسی ایک دن یا ایک فیصلے کا نتیجہ نہیں بلکہ سالہا سال کی مسلسل جدوجہد، عوامی شعور، اجتماعی کوششوں اور مؤثر آواز بلند کرنے کی ایک مکمل تاریخ ہیں۔
ان منصوبوں کے لیے جماعت اسلامی کھاریاں نے سید ضیاء اللہ شاہ ایڈووکیٹ کی قیادت میں شہر کے باشعور شہریوں، فلاحی تنظیموں، تاجروں، سول سوسائٹی اور پریس کلب کے تعاون سے بھرپور کردار ادا کیا۔ مقصد صرف کسی ایک جماعت یا فرد کی کامیابی نہیں بلکہ کھاریاں کے شہریوں کو بہتر سفری سہولیات، محفوظ راستے اور بنیادی شہری حقوق کی فراہمی تھا۔
اس جدوجہد کے دوران متعدد آل پارٹیز کانفرنسز منعقد کی گئیں تاکہ تمام سیاسی و سماجی قوتوں کو ایک مشترکہ مقصد کے لیے متحد کیا جا سکے۔ سکائی ویز ہوٹل میں منعقدہ مثالی جرگہ اسی عوامی اتحاد کی ایک نمایاں مثال تھا، جہاں مختلف طبقات کے نمائندگان نے کھاریاں کے مسائل کے حل کے لیے مشترکہ آواز بلند کی۔
عوامی مسائل کو اجاگر کرنے کے لیے جی ٹی روڈ پر تاریخ ساز ایک روزہ دھرنا، احتجاجی مظاہرے اور مختلف سطحوں پر جدوجہد کی گئی۔ اس پورے سفر میں سید ضیاء اللہ شاہ ایڈووکیٹ، سابق صدر بار ایسوسی ایشن کھاریاں نے قانونی، عدالتی اور سرکاری سطح پر مسلسل پیروی کرتے ہوئے اس مسئلے کو ہر فورم پر مؤثر انداز میں اٹھایا۔
یہ جدوجہد اس بات کی مثال ہے کہ جب عوامی نمائندہ سوچ، اجتماعی شعور اور مسلسل محنت ایک سمت میں آگے بڑھیں تو بڑے عوامی منصوبے حقیقت کا روپ دھار سکتے ہیں۔
آج ان منصوبوں کی تکمیل کھاریاں کے شہریوں کے لیے ایک اہم سہولت ہے مگر اس کے پیچھے موجود طویل جدوجہد، قربانیاں اور مسلسل کوششیں بھی تاریخ کا حصہ ہیں جنہیں یاد رکھنا ضروری ہے۔

20/03/2026

Eid Mubarak