13/07/2026
🍀မနှိုင်းယှဉ်တော့တဲ့အခါ….🍀
မနေ့က သူငယ်ချင်းတစ်ယောက်နဲ့
စကားပြောဖြစ်တော့ သူက တစ်နေ့ကို
တရား ၆ပုဒ်နာဖြစ်တယ်လို့ ပြောပါတယ်..။
ဟယ်…ကောင်းလိုက်တာ..အားကျလိုက်တာဆိုပြီး..သူ့ကို သာဓုခေါ်လိုက်မိပါတယ်..။ တစ်ချိန်တည်းမှာပဲ…ကျွန်မစိတ်ထဲဖြစ်သွားတဲ့ အတွေးလေးကိုလည်း..ဖျတ်ခနဲ သတိထားလိုက်မိပါတယ်..။
အားကျတဲ့စိတ်နဲ့အတူ ယှဉ်တွဲဖြစ်လာတာက…နှိုင်းယှဉ်မိတဲ့စိတ်ပါ…။ ငါ သူ့လောက် တရားပုဒ်ရေများများ မနာနှိုင်သေးဘူး..ဆိုတဲ့စိတ်ပါ..။
အဲ့ဒီနှိုင်းယှဉ်လိုက်မိတဲ့စိတ်ဟာ…ကိုယ်မလုပ်နိုင်သေးတဲ့အလုပ်ကို တခြားသူတစ်ယောက်က လုပ်နေနိုင်တဲ့အခါ…သူ့ကိုအားကျရင်း…ကိုယ့်ကိုယ်ကိုယ် အားမလိုအားမရ..နှိမ့်ချလိုက်မိစေပါတယ်..။
သေသေချာချာပြန်တွေးကြည့်တော့…ကိုယ်လည်း
အချိန်ရရင်ရသလို တရားနာနေကျမို့ အားတဲ့ရက်တွေဆို…နှစ်ပုဒ်လောက်တော့ နာဖြစ်တာပါပဲ…။ ပြီးတော့ကိုယ့်မှာ..တစ်နေ့နှစ်ကြိမ်လည်း တရားထိုင်သေးတာပဲ…တခြား စာရေးစာဖတ်တာ..audiobook နားထောင်တာ..podcasts လေးတွေ နားထောင်တာ..gym သွားပြီး လေ့ကျင့်ခန်းလုပ်တာ..စတဲ့အချိိန်တွေရှိသေးတာပဲလေ..လို့ ကိုယ့်ဘာသာပြန်သုံးသပ်ဆင်ခြင်ပြီး အားပေးလိုက်ပါတယ်…။
တရား၆ပုဒ်မနာနိုင်သေးတာက အားငယ်စရာမှမဟုတ်တာ..။ ကိုယ်လုပ်နေတဲ့ အလုပ်လေးတွေကနေ နေ့စဉ်နေ့တိုင်း ကိုယ်ရနေတဲ့ကုသိုလ်တွေအပေါ် ကျေနပ်ပီတိဖြစ်ဖို့က ပိုအရေးကြီးတာမဟုတ်လား…။
ကျွန်မတို့ဘဝမှာ…ကိုယ့်ထက်သာတဲ့သူတွေဆီ..လှမ်းမျှော်ငေးကြည့်ရင်း…ကိုယ့်ဘဝကိုယ် အားမရတဲ့စိတ်…သိမ်ငယ်ချင်တဲ့စိတ်…ကိုယ့်ကိုယ်ကိုယ် မလုံလောက်ဘူး..လို့ ခံစားရတဲ့စိတ်ဟာ…အဲ့ဒီနှိုင်းယှဉ်လိုက်မိတဲ့စိတ်ကြောင့်ဖြစ်ပါတယ်…။
သူကတော့ တော်တော်အောင်မြင်ခရီးရောက်နေပြီ..ငါ့မှာတော့ ဘာမှဖြစ်မလာသေးဘူး…။ သူကတော့ ချောမောလှပနုပျိုနေလိုက်တာ…ငါ့မှာတော့ တစ်နေ့တစ်နေ့ စိတ်ဖိစီးမှုတွေနဲ့ ရုပ်ကျအိုစာလာပြီ…သူကတော့ ချမ်းသာပြည့်စုံလိုက်တာ..ငါ့မှာတော့ လိုချင်တာလေးတွေတောင်..ပြည့်စုံအောင်မဝယ်နိုင်သေးဘူး…သူကတော့ နိုင်ငံအနှံ့ခရီးတွေပတ်နေလိုက်တာ…ငါ့မှာတော့ ဘယ်မှ မသွားရမလာရ…စသဖြင့် ဆိုရှယ်မီဒီယာမှာ..တစ်နေ့တစ်နေ့ မြင်မြင်သမျှ..သူတစ်ပါးရဲ့ဘဝတွေကို အားကျနေမိရင်း…ကိုယ့်ဘဝကိုယ် စိတ်တိုင်းမကျ..နှိမ့်ချခံစားနေမိတတ်သူတွေ ရှိမှာပါပဲ…။ ဒါဟာ ကိုယ့်ဘဝကို သူများဘဝနဲ့ သွားပြီးနှိုင်းယှဉ်နေမိလို့ဖြစ်ပါတယ်…။
လူတွေဟာ တစ်ယောက်နဲ့တစ်ယောက်..ရရှိပိုင်ဆိုင်ခွင့်တွေ မတူနိုင်ပါဘူး..။ နှိုင်းယှဉ်စရာအကြောင်းကိုမရှိတာပါ..။ သူ့ရဲ့အတိတ်ဘဝကုသိုလ်ကံရယ်…အခုဘဝမှာ..သူဆက်လက်ပြုနေတဲ့ ကုသိုလ်ကံတွေကပေးထားတဲ့ ပြည့်စုံမှု..ကြွယ်ဝချမ်းသာမှု…အောင်မြင်မှုကို ရနေတာဖြစ်ပါတယ်…။
သူလုပ်တာသူရသလို..ကိုယ်လုပ်တာလည်း ကိုယ်ရမှာဖြစ်ပါတယ်..။ သူ့ဘဝနဲ့သူ..ကိုယ့်ဘဝနဲ့ကိုယ်ပါပဲ..။ သူများရထားတိုင်း..ကိုယ်မရလို့ ..ဝမ်းနည်းအားငယ်စရာမရှိပါဘူး…။ ကိုယ့်မှာရှိတဲ့ ..ကိုယ်ပိုင်ဆိုင်ထားတဲ့အရာတွေ…သူ့မှာ မရှိနိုင်ပါဘူး…။
လူတစ်ယောက်နဲ့တစ်ယောက်…ကံချင်းမတူသလို…ဖြစ်ရမယ့်အချိန်တွေချင်းလည်း..မတူညီနိုင်ပါဘူး..။ မတူညီနိုင်တာကို နှိုင်းယှဉ်နေမိလို့ကတော့ …ဘယ်တော့မှ စိတ်အဆင်ပြေပျော်ရွှင်နိုင်မှာမဟုတ်ပါဘူး…။
အထူးသဖြင့် ဆိုရှယ်မီဒီယာမှာ…ပြသထားတဲ့အရာတွေဟာ..လူတိုင်းရဲ့ အလှပဆုံးသော…အတောက်ပဆုံးသော…အပျော်ရွှင်ဆုံးသော…အဆင်အပြေဆုံးသော အခြမ်းဖြစ်ပါတယ်…။
တစ်ခြားအခြမ်းတစ်ဖက်မှာ…အရုပ်ဆိုးမှုတွေ..မှောင်မိုက်မှုတွေ..နာကျင်ကြေကွဲစရာဒဏ်ရာတွေ…အဆင်မပြေမှုတွေ…သေချာပေါက်ရှိနေနိုင်ပါတယ်…။
ဒီအခြမ်းကို သူမပြတဲ့အတွက် ကိုယ်မမြင်နိုင်ပါဘူး…။ လူတိုင်းဟာ…တစ်ချိန်လုံး…လှပပျော်ရွှင်ပြည့်စုံအောင်မြင်နေတာမဟုတ်ပါဘူး…။ အဲ့ဒီအတွက် သူတို့ဘဝမှာ…လှုပ်ရှားရုန်းကန်ရခြင်းတွေ…ရှုံးနိမ့်ပေးဆပ်ရခြင်းတွေ…နာကျင်စွာညည်းညူသံတွေရှိနေဦးမှာပါပဲ…။
တခြားသူရဲ့အလင်းခြမ်းကလေးကို..လှစ်ခနဲမြင်ရရုံနဲ့…ကိုယ့်ဘဝက မှောင်မိုက်ကံဆိုးနေတာမဟုတ်ပါဘူး…။
ကိုယ့်ဘဝကို ဘယ်သူနဲ့မှ မနှိုင်းယှဉ်မိတော့တဲ့အခါ…ကိုယ့်ဘဝမှာရှိတဲ့ ကိုယ်ပိုင်ဆိုင်ထားတဲ့အရာတွေကို အာရုံစိုက်နိုင်လာပါလိမ့်မယ်…။
ကိုယ်ပိုင်ဆိုင်ခွင့်ရထားတဲ့ ကိုယ့်ဘဝအပေါ် ကျေနပ်နှစ်သက်ရောင့်ရဲတဲ့စိတ်ဟာ..ကိုယ့်ကိုလွတ်လပ်ပေါ့ပါးပျော်ရွှင်စေပါတယ်…။ ကိုယ်ဟာ ကိုယ်ပါပဲ…။
ဘယ်သူနဲ့မှ မတူနိုင်ပါဘူး..။ ဒါကြောင့် ကိုယ့်ကို..ဘယ်သူနဲ့မှ မနှိုင်းယှဉ်ပါနဲ့…။
ကိုယ်လုပ်နိုင်တဲ့အရာ…ကိုယ်ရရှိထားတဲ့အရာတွေအပေါ်…တန်ဖိုးထားတတ်လာတဲ့အခါ…ကိုယ့်ဘာသာကိုယ်…တန်ဖိုးထားဂုဏ်ယူလာပါလိမ့်မယ်…။ ကိုယ့်ကိုယ်ကိုယ် ချစ်ခင်လေးစားတန်ဖိုးထားဖို့အတွက် ကိုယ့်မှာပဲ တာဝန်ရှိပါတယ်…။ ကိုယ့်ကိုယ်ကိုယ် မပေးနိုင်တဲ့အရာကို တခြားသူကလည်း လာပေးမှာမဟုတ်ပါဘူး…။ ဒါကြောင့် ကိုယ့်ဘဝမှာ…ကိုယ်လုပ်နိုင်တာတွေ…ကိုယ်ပိုင်ဆိုင်ထားတာတွေအတွက်…အစွမ်းကုန်သာ ဂုဏ်ယူနေလိုက်ပါ…။ ဒါက ကျေနပ်စရာအကောင်းဆုံးဘဝတစ်ခုဖြစ်နေလို့ပါပဲ….။
#လွန်းထားထား
#မနှိုင်းယဉ်တော့တဲ့အခါ